أيام مصرية

أعيد هُنا نشر 17 تدوينة قصيرة شاركتها عبر صفحتي في موقع "الفيسبوك" الإجتماعي (من خلال الستاتوس) عن بعض الأيام والذكريات التي عشتها في مصر في آب/ أغسطس وأيلول/ سبتمبر الماضيين (2011).

‎"يوم في مصر 1":

البائع: إنتو من فين؟

ر.ن: أنا من لبنان

ر.ح: أنا من فلسطين

البائع: يعني ده الموج كان عالي وجابكو لحد هنا؟

‎"يوم في مصر 2":

مين قال إنه القاهرة مدينة "لا تنام"؟ هي بتنام، ولكن مش بالليل..

‎"يوم في مصر 3":

إنك تكوني في تاكسي وقت عز الزحمة بعد الإفطار، أو يجي عَ بالك تركبي قارب على النيل في نص الليل، أو لما تشربي قهوة الصبح (والصباح نسبي هون).. ودايما مزاجك جاي على عبد الحليم، فش حاجة تدوري على أغنية محفوظة عندك أو في اليوتيوب، كلّ المسألة إنك تفتحي على موجة 105 إف إم.. هو دايماً موجود، وبختار أغنياته على مزاجك.. تماماً، ما هو بغنّي هون 24/7.. وإنتِ عارفة إنه يمكن مليون حدا غيرك عم بسمع نفس الأغنية، عَ القليلة.

‎"يوم في مصر 4":

كيف نشفى من حبّ تونس ومصر؟

وبالإذن من درويش، مين قال إنه لازم نشفى؟ خاصة لما المرض يكون الحبّ..

‎"يوم في مصر 4":

البرينس في إمبابة

‎"يوم في مصر 5":

كلّ الأحاديث عن الثورة المصرية وتفاصيل أيامها، وأهم من هيك نبرة صوت المتحدثين والمتحدثات؛ التأثر، اللهفة، الحبّ، الفرح، القلق والقصص المليانة سخرية وضحكات عالية.. وهني عم بحكوا، كأنهن عم بحكوا عن شي حصل مبارح.. أو قبل شوي.. الثورة المصرية مستمرة!

‎"يوم في مصر 6":

إنك تتمشي على كوبري "قصر النيل" مع صديقتك التونسية، صديقك العراقي وصديقك المصري..

‎"يوم في مصر 7":

إنك تمشي في "ميدان التحرير" وجه الصبح، وتشوفي كلّ أحلامك؛ اللي مرقت، واللي عم تتحقق. واللي جاي مع الشمس.

‎"يوم في مصر 8":

إفطار رمضاني وبروفا مع فرقة "اسكندريلا"؛ موسيقى، أغاني، فؤاد حدّاد، صلاح جاهين، الشيخ إمام، أمين حدّاد، سيد درويش، مصر وفلسطين والوطن العربي.. كلّه كان حاضر بهالبيت الدافي.

شكراً على الحبّ والأمل

‎"يوم في مصر 9":

إنك تتمشي في شوارع "وسط البلد"، وتعرفي توصلي للمقهى اللي بدك إياه.. بدون ما تضيعي.. وما تتصلي بصديق تطلبي إنه يوصفلك الطريق.. وحتى وإنت ماشية للمقهى، يجي حدا يوقفك بالشارع يسألك كيف يوصل للمكان الفلان، وتعرفي توصفيله كيف.. يبقى إنتِ أكيد في البيت :)

‎"يوم في مصر 10":

ناي غنّت في القاهرة، صوت فلسطيني غنّى لبنان ومصر وفلسطين.. أكثر من 63 سنة من الاحتلال ما قدر ولا رح يقدر يمنع أم كلثوم، فيروز، سيد درويش من بيوتنا..

"ويا ريت صدري جسر أعبركم عنه.. ونعيش أنا وياكو عيشة فلسطينية"

‎"يوم في مصر 11":

أكلات فلسطينية ولبنانية في صحبة القاهرة والأصحاب الطيبيين.. عشان نضل نحلف بهالليلة.. وبصحتكم

‎"يوم في مصر 12":

لما تتأكدي إنك بتشبهي هالمدينة.. وإنه قلبك متل النيل، قادر يتدفى فيها..

‎"يوم في مصر 13":

حكالي صديق: القاهرة هي إنك تشوفي الشروق والغروب من نفس الشباك وبنفس النهار.. بدون ما يكون في فاصل بيناتهن..

‎"يوم في مصر 14":

الإسكندرية، هي أول مدينة على حوض البحر المتوسط بكون فيها بعد مدن الساحل الفلسطيني، ما عدا غزة المحاصرة.. قديش ممكن مدن تكون بعيدة عن بعضها 63 سنة من الاحتلال وبتضل تشبه بعضها؟ ذات الألوان والبحر ووجوه الناس.. شي يوم رح أركب قارب من الإسكندرية وأمرق على عكّا ألمّ شوية أصدقاء من الشطّ ونكمل نسهر على شط بيروت.. شي يوم..

‎"يوم في مصر 15":

إنك تشربي قهوة مع كفافيس في بيته.. وتتجولي بين الغرف، وتقعدي على كرسيه وتكتبي على مكتبه.. وبعدين تروحي تفطري مع أصدقائك في "ألبان سويسرا".. وتعرفي إنك رح تضلك شبعانة 3 أيام.. عَ المساء تمرقي تسلمي على سيد درويش، وتوصلي لهناك تكتشفي إنه بيته أنقاض.. وتلعني الدنيا مليون مرة! ليش كفافيس لا زال عنده بيت وسيد درويش لأ!؟ ها!؟ وبآخر هالليل ما إلك إلا البحر.. لأنه منه رح تسمعي صوت يقول: مصر يا أم العجايب..

‎"يوم في مصر 16":

إنك تودعي صديقتك المسافرة بيروت كمان شوي.. وتتأكدوا إنتو التنتين إنه شي يوم ما رح تضطري تودعيها بالقاهرة.. رح تسافري معها بيروت، وتنزلي من هناك بالمواصلات العامة إلى عكّا.. وتلتقوا على الشطّ اللي عَ بالكو.. وقت ما بدكو.

‎"يوم في مصر 17":

وإنتِ تودعين المدينة صباحاً، أغمضي عينيك طوال مسافة الطريق، كي لا تتأمليها بعيون راحلة. الطريق بشعة، وأغنية "طريق المطار شو حلوة" غير سارية المفعول.. وإنت تودعين المدينة صباحاً، تأكدي أن الذكريات المخبئة في عيونِك، ستُنير أيامك القادمة، ودرب الرجوع إلى المدينة.