المطلوب من فيسبوك: تطبيق See your memories in the inbox، من غير إمكانية لـ "شير"، عشان أكيد المخفي أعظم وأحلى. المطلوب من واتسآب: إمكانية وصول Notifications كل ما حدا من قوائم الاتصال رجع لتاريخ محادثة قديمة بيناتنا. من جهة، يمكن هيك إمكانية تخفف وجع قلب، بحيث ما حدا يسترجي يرجع للمحادثات القديمة (عشان الآخر رح يعرف)، ولا حتى أنا.. ومن جهة ثانية بتعرف مين بوجع قلبه مثلك أو مشتقلك أو بفكر فيك.. حتى لو عامل حاله "مش فارقة معاه". المطلوب من فايبر: تختفي. عشان أسهل الواحد يمنع موبايله من الاتصالات الدوليّة من إنه يمحاك، خاصة لأنك مجاني وسهل المنال. المطلوب من سكايب: تخترع إشي إنه تخلي الكاميرا بتصوّر من الشّاشة، ومش من فوقها، عشان لما يكونوا اثنين بحكوا سوا، هم بالضرورة صعب إنه يلتقوا فعليًا بهاللحظة اللي عم بستخدموا السكايب فيها، وبالتالي، لما بدهن يطلعوا بعيون سوا، تزبطها هاي تقنيًا، مش إنه واحد بتطلع ع الكاميرا والثاني ع الشاشة عشان يشوف عيونه ومش يكونوا عيونهن قدام بعض. المطلوب من تويتر: ضلك هيك، مساحة كبيرة قد الدنيا من غير ولا تفصيلة حميميّة.